2Cor 4 | KYG | STEP | Goti'a hau huno lateteno ani ali'ya'mo lami'niya'mofe'mo laipamo'mo kana nosigeta no'atalone.

2 Corinthians 4

1 Goti'a hau huno lateteno ani ali'ya'mo lami'niya'mofe'mo laipamo'mo kana nosigeta no'atalone. 2 Lagaemo lavagage osisiyafe'mo hosu kavatimo aeta ati nokaone. Humi lapateteta Goti ge'amo alita afe leta anonale alu gemo no'malone. Lagaemo Goti aulagale'mo lama ge'amo afole yategamo aeta hakalo huta hapa nepaunageno'ae'mo muki vaya'ai yu'ilaga ne'apimo'a, lama gemo nehaya vaya'mo mai'nae, huno nehiye. 3 Alagepa faigoko getimo lavolavoleti'mo aino ati kae'nisiya'mo'mo Goti'a alino apago'ya lagauno apatalesiya kate'mo ne'vaya vaya'ai apaipafike'mo aino ati kae male'nige'a no'agae. 4 Ma mopafi vaya'mogi goti'apimo'a apakesa afi'a fatago nosaya vaya'ai apakesamo afisaya apaulagamo alino fali kaeno apate'nige'apae'mo afa'a no'agae. Kalaisi'a Goti aune'amo alagi mai'niya'monanafa apakaemo Kalaisi ha le konali ya'ae'mo alagepa faigoko ge'amo'a aeno ha neleya konali ya'amo afa'a o'agegae. 5 Lagaemo lagaitie'mo aeta hakalo nosupa Yesu Kalaisi'a Ala kava netieke'mo aeta hakalo nehune. Lagaemo Yesu agi'alefe'mo ali'ya'amo ne'aluna vayatapimo mai'none. 6 Goti'a hani hu'niya yapife'mo, aeka ha lo, huno hu'niya Goti'a laipafife'mo, aeka ha lo, huno hu'nigeno Goti ha le konali ya'amo Kalaisi augosafati'mo aeno ha le'nigeta age'none.

Mopa samogana huta ne'maune, huno hu'niya gemae

7 Vaya'mogimo lage'apae'mo, himamu'apimo apakae ya'mo ohane'nifa Gotitegatike'mo aeno agase'niya himamu'amo ali'nae, hu'a hisayafe'mo lagaemo ina agufa mopa samogana huta mai'nonageno'ae'mo ani lusi alagepa ge'amo mopa samofi'mo male'niye. 8 Hanageke ya'mo'a faino ku aino late'niya'monanafa ka'mo afa'a hane'niye. Na kava hugupi huta lagesamo no'afuna'monanafa laipa lagesamo alagi asagauno no'aiye. 9 Apaini hu'a nelataya'monanafa Goti'a lataleno no'viye. Lamagi'nageta asagauta ne'auna'monanafa nofalune. 10 Yesu'a afa'a mai'niye, huta lagufaleti'mo alita apave lisunafe'mo Ala kava ne'mo Yesu'a fali'niya agufa kava'mo lagufale'mo alinita ne'une. 11 Yesu'a afa'a mai'niya himamu'amo kasalisiya lagufale'mo lagesayafe'mo afa'a maiyategamo ne'mauna vaya'mogita Yesu agi'alefe'mo lamagisageta falisuna kavategamo mai'none. 12 Inagi falisuna kava'mo'a lagufafi'mo ali'ya'mo ne'aliya'monanafa Yesu'a afa'a mai'niya himamu'amo'mo lapaipafi'mo ali'ya'mo ne'aliye.

13 Goti mukufi'mo avo'mo kae male'niya gemo'a huno'ae'mo, Nagesa afi'na fatago hu'nova'mofe'mo ge hu'nove, huno hu'nigeta ani magoke Aune'ae'mo lagesa afita fatago nehuna aepa vekamo Aune'amo ali'nona'mofe'mo lagae'e'mo ge nehune. 14 Lagaemo afi'nonana Ala kava ne'mo Yesu'a ago alino he tino ate'niya vekamo'a Yesu'e lagae'e'mo alino he tino lateteno'ae'mo lapakaegi'e'mo lavalelinuno agae'e'mo magokepi alino lokaeno latesigeta lokaeta maigune, huta afi'nona'mofe'mo ge nehune. 15 Lagaemo lapa maesunafe'mo muki mani agufa kana ya'mo alita ne'maune. Goti'a asole vaya'aina fiku hapa maeno ne'apamiya kava'amo aino atagu faeno uneno hisige'a mago'e mago'e hu'a hao ke hete'apae'mo Goti agi'ale'mo ali'a asaga hu'a atesayafe'mae.

16 Goti'a alino he tino lategaiya'mofe'mo laipamo'mo kana nosigeta no'atalone. Afole netimo alino kalagu kime kime ne'viya'monanafa muki afina'ae afina'ae'mo Goti'a yu'ilaga netimo alino hegafa huno ne'ate. 17 Aise hanageke ya'mo aise afina'mo ne'aluna kava'mo'a alino alo huno nelateyanageta anona'ale'mo lusi kava huno aeno agase'niya ha le konali yatimo hanege hanege huno hanesiya ha le konali yatimo aligune. 18 Lagaemo ne'agona yafe'mo lagesamo o'afita no'agona yafeke'mo lagesamo ne'afunageno'ae'mo alo huno nelate. Ne'agona ya'mo'a yoka afina'mo hanegaiya'monanafa no'agona yatimo'a hanege hanege huno hanegaiye.